من روائع شعر الدوش ( محمد ود حنينه_________ ودقت الدلوكة )

دقّتْ الدَلّوُكَهْ

قُلنا الدنيا ما زالت بخير

أهو ناس تعرِّس وتنْبَسِط

تكْكَّتَ سروالي الطويل

سويتْلُو رقعات فى الوسط

فى خشْمِ عضّيت القميص

أجرى وازيّد شوق وانُط

لا مَن وصلتَ الحفلَهْ زاحمتَ الخلق

وركزْتَ

شان البِتْ سُعاد

أصلى عارف جِنَّها فى زول بيرْكِز وينْسَتِر

لكنِّى عارِف إنَّها

لو كلو زول فى الحلة بالسُتْرَهْ إنجَلَد

يانى الآزاها وجِنَّها

برْضِى عارِف أظنَّهَا

دِيمهْ فى صَرَّ ة وشيهَا

يلفحْنى شوق نافِر لَبَد

وركزْتَ للحُرقَهْ المَشَت فوق الضلوع

تِحت الجِلد

ضمّيت قزازتى مرقتَ عِن طَرَف البلد

وسِكرْت جَدْ

وأنا جايىّ راجعِ مُنْتَهى لاقتْنى هِى

قالت "تعال"

كِبْرَتْ كُراعى من الفرح

نُص فى الأرِض نُص فى النِّعال

اتْلخْبَط الشوق بالزَّعل

اتْحَاوروا الخوف والكلام

"ه-يْى يا سُعاد

على ودْ سكينَهْ وكِلْتِي في خشمو الرماد

علي ود سكينَه ومَات أسى

وأنا بِت بلاك ملْعُون أبوى لو كنتَ أرْضَى أعرِّسهْا

وأنا يا سُعاد

وكتين تصُبى سحابَهْ تَنْزِلي زي دُعاش

بفْرِش على روحى واجيكْ

زولاً هِلِك تعبان وطاش

وأنا يا سعاد وكتين أشوفِك ببقى زول

فَرَشولوا فَرْش الموت وعاش)

قالت سُعاد

(بطِّل كلام الجِرْسَهْ انجض يا ولد)

مزّقْت روحى نِتَف

مرّقْتَ من جيب القميص

عرقى وأسق

طبّيت قزازتى وصلتَ لى طَرَف البلد

وسكْرتَ جَد

اذّنت فى الشوك والسَلَم

وسرحْتَ بالناس والغَنَم

وركعتَ للعرقى البِكِر

وقدتَ فى الألم الحِكِر

وحلمتَ زى شالنى ومشَى

فوف زحمة نْبيْ الله الخِضِر

صحَّانى صوت العُمدهْ قال

(مسئول كبير زاير البلد)

قال لينا

(وكَتْ الزول يجِى ، لازِم تقيفوا صفوف صفوف

وتهيّجُوا الخَلا بالكفوف

وتقولوا عاش.. يحيا البطل)

صلّحْتَ طاقيتي الحرير

واتنَحْنَح الحشا بالكلام

ورميتُو من حلقى الوصَل

قُتْ ليهو يا عُمدهْ اختشى

مسئول كبير في الدنيا غير الله اِنْعَدَم

ما شُفْنا زول رضّع صغار

ما شفنا زول نجّح بَهَم

ما شفنا زول لمْلَم رِمَم

لا صِحِينَا عاجِبنا الصباح

لا نُمْنَا غطّانا العَشَم

والحِلَهْ من كلَّ الجِهات محروسَهْ

بالخوف والوهم

ومضينا من زمناً قديم-يا عُمدهْ-مرْسوم انتحار

الموت مُباح

والحب نِطاح

والصِدقِ من جِنس الزِّنا

العافيهْ مولودَة سِفاح

والرغبَهْ مكسورةَ جناح

الحلم والوعد النبيل

الطِفلهْ والأم ، النخيل

الرّنَهْ فى الوتر الاصيل

تلقاهَا فى قاموس نكاح

يا يُمَّه واح..يا حِلَّهْ واح

***

يا سعاد تعالى ولمِّى من كل البيوت

عِدَّة السَفَر الطويل

زَخْرِفى الفجر النهار

شخْبِطى الضُحى والأًيل

المَغْرِب

الفجر

النجوم.

فى صُرَّهْ وارمِيها البحر

خلِّينَا فوق الشك نَعُوم

والعُمدَهْ فاض

العُمدَهْ صار مليون عُمَد

العُمده فيل

جبلاً تقيل

لبْوَهْ وأسد

حَسَنَهْ وغَصِب

جُمْعَهْ وأحَد

بقّيتْ قزازتى

مرقْتَ عِن طرف البلد

وسكْرتَ جَد

وأنا جايى راجِع أجهجهو

لاقانى هو

سايق العساكر والكلاب

رامى بين عيني وعينو

كلب وتَكْشيرهْ وحُراب

ضاقت نِعالى من الزّعل

من تحتهَا اتْمَلمل تُراب

الغيم سكب ضُلو ومشَى

والدنيا غيما سراب سراب

والحِلهْ زى بلداً بعيد

زوَّد بُعاد وقُرُب سُعاد

اتجمَعَت كلَّ البيوت فى راحتَا

زى بِت لِعاب

مجنونَهْ تصرخ فى الزوال

ممزوجَهْ فى الدم واللُعاب

عينيَّ ضاقت نظْرَتهْا

والجوف يطقْطِق بالكلام

قُبَّال يقولوا لي سلام

اتلمُوا حولى بلا نِظام

شال وعِمَّهْ

توب وغُمَّهْ

فاس وطوريَّه وحزام

شالونى بى كُل إحترام

ورمونى فى قَعَر السجن

حصلّنى قبل اليوم يِتم

جارنا المدرِّس ودْ خدوم

قال ليَّ

لا زول قام هتَف

لا كف مشَت بتلاقِى كَف

والعُمدَهْ زى هَمْبول وقف

يا صمت أُف

يا دنيا تُف

وأنا يا سُعاد للشوق نغَم

للهَم عَلَف

طه المدرس ود خدوم

يا تلاميذى العُزاز

بسم الله

بسم المجد فى أحضان سُعاد

اكتبوا التاريخ

خمستاشر ربيع أول

والمُوافِق

موِلد الايقاع على خطوات سُعاد

والمُرافِق للصباحات ، المناحات

واخضرار الغيم وفقدان الشُعاع

ارتفاع الموجهْ لى صدر الشراع

اكتبوا

ارتفاع الموج إلى صدر الشراع

يا تلاميذى العُزاز

خلِّى بينك وبين زميلك

زى مسافَهْ

قَدْر أيه؟

قَدْر المسافَهْ البين عيونى وبين سُعاد

قَدْرِ آلاف الفواجع فى انهيارات الحصاد

قدْرِ مسحوق الأنين فى تواريخ البُعاد

اكتبوا

.........

...

ودَيَّه أيه يا اْستاذ يكون؟

دا المُجنن طه اسألأوا ودْ سكِينَهْ

اسألوا الريح المسافر فى تجاعيد السكينَهْ

شاوِرِوا الموج اللِّى ساكِن فى مسافات السفينَهْ

تسألونى عن سُعاد

اكتبوا العنوان بخط ممشوق وواضح

احذروا اللحظ البيضحك وهو جارِح

مُرْكَب على الله ويلأّ نجتاز الحدود

اكتبوا العنوان بِخَط مستور وفاضح

(رقصة الموج الأخيرَهْ جُموح نُهودِك يا سُعاد)

عنوان طويل

يا تلاميذى العزاز

كِلمَهْ..كِلمَهْ على مهلْكُم واكتبوا

والصيف طويل لمْلَم العُشاق مواعين الرحيل

نجمَهْ شاردَهْ

وغيمَهْ هاجدَهْ

ضَمَّهْ ضَمَّهْ ضَموا شرف المستحيل

جَوهَرُوا الحزن الكحيل

مُركَب على الله ويلأّ نجتاز العويل

بانت سُعاد

غامت ملامح السكَّهْ وانكتم المكان

رَقَصتْ سُعاد

فى خانَة الأصفار وميلاد الزمان

جمّعتْ من كل زهرَهْ مواجع الحُب المُهان

مُركب على الله ويلأّ نجتاز الدّثخان

يا تلاميذى العزاز

خلّوا بينكم وبين رنين الضحكة صرخَهْ

حُب مُهان والصبر أولىَ

خلُّوا بينى وبين جنون الخيبَهْ شَوْلَهْ

واكتبوا

(عاشَ فى زمن المذلًهْ المدعو طه ودْ خدوم

باع تفاصيل الكآبَهْ عشان يفرِّغ وتانى يمْلاَ

جاع وخيرِك يا سُعاد مرْدُوم رَدوم

عاش المدرِّس ود خدوم

كأنو نكْبَهْ -كأنو شُوم

عاش المدرِّس ود خدوم

تسْقُط حكايات الهموم

الأزاهِر

والدفاتِر

والمتاجِر

والمقابِر

والخافر والمشاعر والنجوم

عاش المدرِّس ود خدوم

يا تلاميذى العُزاز

من كانَ حاضِر أو تَوَلَى

يقفِل الكرّاس ويلأّ

نشوف بداية المهزلَهْ

***

يا تلاميذى العُزاز

فى صيف طويل مبطوح على صدر الزمن

منظُلمَة الشوق ابتدا

فى حضرَة الحُب اندَفن

والنيل مدامِع للنجوم

والصبر مُفتاح للشجن

والحِلَّهْ مبتورَهْ وكسيحَهْ ومُهْملَهْ

بانت بداية المهزلًهْ

بانت سعاد بانت تفاصيل الشجون

والجنون والمقصلَهْ

بانت سُعاد

وقفتْ على خِصر الجبل

فتَحت مشارع للظنون والأسئلَهْ

رقدَت على شَعَر السهل

ضفَرت ملايين القُبل

"والجو صفا والنيل هَدَا

وغاب الأتر"

وأنا يا سُعاد

فى الحِلَّهْ معجون من رماد من حسرَهْ

مقطوع من شَدَر

يا تلاميذى العُزاز

لا زوايَهْ لا قوس لا وتَر

وأنا يا سُعاد

فتّشتَ ساحات الأمانى

ناصيهْ ناصيهْ

حجر حجر ، ما لقيتْ إلاّك زمن

مالقيت إلا بِلاد

وأنا يا سُعاد

يا شهوَة الحُب للعِناد

يا شهقَة الفرح المُعَاد

خلِّينى فى بالك نغم

وأنا يا تلاميذى العُزاز

مخلوق بسيط من شوق وغَم

وأنا يا سُعاد مخلوق بسيط من شوق وغم

قامت سُعاد من رقدتهْا

الكون جميع كان انحصر مابين

قيامَهْا ووقفتَهْا

النخلَهْ والهجليجَه والسيّالَهْ

والشوق والمطر

الغابَهْ والهم القديم

الفرحَهْ والذُّل والخطر

كلُّو انْجَمَع فى كفّتهْا

قامت سُعاد من رقدتهْا

قامت قيامة العُمْدهْ مليون اتجاه

اشتَّتتْ كل الجموع

من كلِّ أنَّهْ وكلِّ آه

ومشيتْ عليكْ أنا يا سُعاد

حتَّة مُعلَّم مُبتدىء

غاوِى وبسيط

ولو ما خَدوم

كان من زمان محْسوب لقيط

ما آصلى مولود لللَقِيط

أو مُغفّل

أو مبهدَل

أو عبيط

يا زعيطاً يا معيط

ومشيت عليك أنا يا سُعاد

شُبّاك على النار انفتَح

درويش نحيل

فى صُرَّهْ شال حزنو وسَرَح

سيلاً تقيل

وسَّع خطاويهو وكَسَخ

ومشيت عليك أنا يا سُعاد

مربوطهْ عينى على خُطاك

فى عيونك اتجمّع كلام

فى صوِتك اتجمّع ظلام

حسيتو فى الحَشَا والعِظام

وقريتو فى سعف النخيل

ولمحتو فى طوق الحمام

فى العفهْ والخُصْلهْ الحنِينَهْ

اللفْتهْ والتوب والحِزام

بارَت مواعيد الغرام

ونزرْتُو حُبِّك للزنازين

والمساجين والهوام

والعُمدهْ فوق راس الفرح

جمّع جريوْاتو ونبح

(مسئول كبير زاير البلد)

قُتْ ليهو يا عمدهْ اختشى

مسئولك الزاير الكبير

يا ريتو بس لو شاف سُعاد

كان رسم للعفَّهْ

أوصافا وتقاطيعا ومقاسا

كان دخل للحِلَهْ من بابا وشبابيكا وأساسا

كان اتْوَلد برَّهْ المُتاجرهْ

والمحاورَهْ والمصاهرَهْ والخساسَهْ

كان تاب

وباع للصدقِ مجدو وذمّتو

يمرُق جديد

من حَر دهاليز النِخاسَهْ

من هدومِك يا مرازِل

يا مزابِل

يا مباخر للتعاسَهْ

يا مناكر

يا عساكر

يا ، سُعـــــاد

......

فِك علَى كلب الحراسَهْ

.....

يا تلاميذى العُزاز

فى يوم طويل مبطوح على صدر الزمن

اتلمّت الحِلَهْ

الحنينْه عشان وداعَك يا غروب

حُزن فارس

وكيف يصير فى لحظَهْ مولَى

كيف يجوز

يا عمدَهْ كيف؟

الذُّل مُصان

والحّثب مُهان

والسجن أولى؟

كيف لقيت يا عُمدهْ كيف

للمجازر

والخنازير

والخناجر

فى رموش الغيم مَحَلَّهْ؟

كيف بنيت يا عُمدهْ كيف

من رماد حزن المآتم

من تُراب غضب المآتم

ليكْ ولى ضيفَك مَظلَّهْ

حِلَّهّ حادَّه

وإنتَ تزْرع فوق ضُوع الوادي حفْلَهْ؟

كيف يجوز؟

قد يجوز وقد يجوز

يا تلاميذى العُزاز

ضَلّض مَن قَد لا يحوز

من تبتّلْ أو تيَمَمْ

أو تيتَم أو ترمّل

يا تلاميذى العُزاز

اكتبوا التاريخ

خمِستاشر سُعاد أوّل

صالح ود قنعنا

شميس المغرب الممْحوق

تميل فوق وشّك المحْروق

تبين صُفْرَة سنيناتَك

يبين ضُل الكلام مقْلوب

تمِيل يا صالح الأيام

ولا عاشرتَ هِدْماً زين

ولا حتّيت تُراب السوق

تَفضّل..

تفضّل يا حفيف الضُل

ورُش جرجيرَك البايِّت

وعِد ليمونك الفضّل

وكوِّم حُزنك الباير

وبيع من غير تشاوِر زول...

تواريخ دمّك الفاير

وتفرُش فى الضُحَى الأعلى..

تبيع سأم العُمُر كيمان

ولا لا فتات

ولا أوزان

لا أتْمَان

تَشِد ترْكَب قفَا الأيام

زَهضج خيلَك يِلَد تيمان

فرس شوقَك دوام مسْبوق

تميل يا صالح الأحلام

أهو القدَّامك البتبيعو..

أشواق الصبا الأيتام

وبرْضَك ما بْتبيع لى زول

أسف ربيّتُو فوق كتفك

ولا عشقاً شْبِع أوهام

أهى الطاحونَهْ يا صالح

أهو السوق الصبِح ألغام

تفضّل ..يا خفيف الضُل

ورشْرِش صبرَك الناير

وارفَع صوتَك الحنضل

وألعن ما يهمّك زول..

أبوك يا سوق ، سليل الغم

أبو الطوريَّهْ والمنجَل

وخال الرّجْلَهْ عم الدنيا جِد الفِجْلَهْ والفِلْفِل

وشَكْل القُفَهْ والكرتونَهْ والجردَل

والعَن ما يفوتَك زول

من الشارين من البايعين

وجِنْس البِرضَى والبزَعَل

واشْتُم ياخى أيه فضّل؟

أيه يحصل؟ وهل تقبل؟

تميل يا صالح النجمات

مع القمر الخصي واهبَل

مِتين يا صالح الآمال

تميل ترقُص وتِتْعدَّل

واضحك لا يشيلك هم

على النيل الصبح مَبْول

صَحِي الأمواج بتتْبهدَل

(صحِي الأمواج بتِتْبدَل؟)

!وبرضو سُعاد حتتْحوّل؟

لا يُمْكِن

دى شمس الضُحى الأعلى

ومشيَهْ حنينَهْ تحت الضُل

وتكْيَهْ طريَهْ فوق رملَهْ

دى أحلام جاريَهْ مُنْبهْلَهْ

وما مًمْكن تقيف إلاّ

وليد العُمدهْ يلْعَب بي

يدرْدِق فى الحرير كرْشو

يعاين فى النِّعال وَشِّو

ويقْدِل فى الفريق تمساح

ينادى سُعاد

تَلِم الكون تحت ضُل الضُحى البوّاح

تصوّر يا خفيف الضُل

دا عِندو الهمسَهْ عِندو الغمْزَهْ عندو اللمْسَهْ

!أمر مُبَاح

ونقْطَع من لحمْنَا الحي

ونقْعُد فوق شحمْنا السَّاح

ونهتف نحنا مشويّين ومقليّين

دَا يا عُمدتنا ياهو الصاح

وياهو الصاح

وياهو الصاح

أيا عِزَّة نَفِس برَكَت

متين بتسِّوى لينا جناح

واشيلك يا سعاد وامْرُق

من الزمن الدّنى ونبّاح

واشيلك يا سعاد وامرق

من الزمن الدنى ونباح

والعمدهْ صاح

يا ولد

يا إنتَ يا صالح

تعال شِد الحُمار

وانْدَه سُعاد

شِد الحُمار واندَه سُعاد

-ده قليل على يا عُمده فى هذا الصباح

والعمدهْ صاح

أندَه سُ ع اد ..شِد ال حُ م ار

وا فرحَة الحُب المطرّز بالمراسيل

والغُبار

يا دَه السَماح

دَه كتير عليْ يا عُمدهْ فى هذا الصباح

شِد الحمار وانده سعاد

يا فرحتك يا ود قِنِعْنَا

ما بِهِم شَدْ الحُمار

إذا نهايتو تشوف سُعاد

يا ده السَماح

أدّينى بس يا عُمدهْ بس

يومين صباح

وغروب طويــــــل

أقْدَر ألمِلْم فيها عفَش الروح

واشد عصب المسافَهْ

الواقفَهْ

بينى وبين سعاد

ادُق يا عُمدهْ بينى وبين حِماك

أوتاد

وارقُد فى ضواحى السُوق

وأحلَم والعمر مشنوق

تجينى بلاد

أبيع فيها الفَضَل من شوق

تطوفْنى بلاد

أغيِّر فيها شكل القُفَهْ

والأسياد

وادِّينى بس يا عمدَهْ بس

يومين نهار مع ليل طويل

أقْدَر أغيِّر فيها طعم البوح

واقولِك يا سُعاد

سُعاد ليمون

سُعاد نعْناع

حكايَة ليل

على درب الهوى الضَيّاع

سُعاد ميعاد

مجاعَهْ وزاد

على درْب الهوى الجوَّاع

واقولِك يا سعاد

"يا دَه السماح

ايا عِزَة نِفس برَكَت

متين بنْسوِّى لينا جناح

واشيِلك يا سُعاد

وامْرُق

من الزمن الدَّني

ونبَّاح

العمدة جابر

العُمْدَهْ جابِر

والصباح نَديان رطيب

فى اِيدو كان مَاسْك الشروق

فى جيبو كان طاوي الغروب

فى كرْشُو قَاعِد منْبَسِط

فى الكُرسي كان

مَاهِل خصيب

ما عُمْدَهْ يَاخْ

والفرَح أِْكَال يطِيب

الشَيَّهْ والجمر الشَّهي

الشِيشَهْ والشَّنَب المولِّع حُمَّى

قِفْ

العُمْدَهْ جابر - الكرسى طَقْطَق تِحْتُو-

مَدَّ ايدو على الأوامرِ

والأوامِر

ما بتطْلَع بَسْ كلام

مِن جسمو بِتْنِز

مِن حَشَاهو

مِن صلَف مَعْمور وعامر

مِن قبور أجدادو تزحف

للأصاغِر ..والأكابِر

مِن منابِت شَعَرو تَطْلَع

مِن نهايات الأظافر

دَه الصباح

العُمدهْ جابِر

نَادَى صالِح وَدْ قِنِعْنَا

الله ..الله على الأوامِر:

إسْتَلِم يا وَدْ قِنعْنَا

تسْتَلِم أَمْر الأوائل

تَلْقَى طالِع للأواخِر

تَسْتَلِم أمْر اللِّى عايش

تلْقَى من أهل المقابِر

واوْعَىَ من فضلك تَغَالِط

دِى الأوامِر

ودِى الدفاتِر

ودِى العساكِر

وافتَح السِّكهْ اليَمُر

سيدنا آمر

ابن جابر

واسْتَلِم يا وَدْ قِنِعْنَا:

إنتَ عارِف بيت سُعاد ،

وعارف إنَّك من قَبيلَهْ

لا رأينَا

ولا سِمِعنْا

ولا عِشمْنَا ولا ..

طِمعْنَا

وانت مُرْسَال يا ..بَجَم

تدخل البيت زى كأنّك..

مارِق الآن...

من جهنم

ولمَّا تَطْلَع ليكْ سُعاد

كُون خفيف ..زي الأمل

ومرَّه أتْقَل

زي جَبَل :

أوْعَىَ تَفْرَح ..

أوْعَى تزْعَل

واقْصِر ايدك من سلام

خلّى نَظَركْ يِكُون كفيف

ومَشِيكْ يكون...

ناعم..

مُغرْبَل..

ولما تَطْلع ليك سُعاد

زي حلم فى توب رهيف..

أدّيهَا ضَهَركْ يا ..

مُغفّل..

وبكُلِّ ما علّمْتُو ليكْ

من طاعَهْ

من ذُّل..

من وجل...

أمْرُق حشاي قِدَّامهْا يلْمَع

بالوجع..

قُول ليهَا..

لمَّا الشوق يبين..

مابين ..شجيرات الأراك

والفرحَه تغْسِل طرْحتهْا

والبدر يمشى على الهلاك

والخوف يكون لسَّع جَنين

فى رُكْنِ من ساحة الوَّلَه

فىزاويَهْ من ساعة الحنين

ما بين..

دِى ارْضَك..

ودَاكْ سَمَاك..

العُمْدهْ منْتظْرِك هِناك..

.......

ومِن هِناك..

درْبَك عديل..

نادِى المُدرِّس .. وَدْ خَدوم..

والمديرِس وَدْ خدوم..

العُمْر مربوط بالجرَس

والصبْرِ مشْنوق الضُحى

والخوف نَزَل من غير حَرَس

والعُمْدهْ فوق كل الأصول..

لمْلًم جِرايواتُو و..

جَلَس..

عُمدةْ فوق كل الفصول

فى التلاميذ..

فى الطباشير

فى التعابير ..فى النَّفَس

يا طه يا ..

يا إنتَ يا

يا ودْ خدوم..

ملعون أوهو الكان ده يوم

الإنتَ عريان وقَّفَك

والعمدهْ قدَّامك رَفَس

وعليكَ إنتَ براك تخمّن

هل تكّلم

أم تنَحْنَح

!!أم عَطَس

والعُمدهْ قال:

يا إنت يا ..

يا طه يا

يا ودْ خدوم

أنا عندي إنتَ براكَ كوم

والحِلَّهْ كوم..

يَاخ ديل بَقَر

فى أحْسن الأحوال غجَر.

أنْسَانى من كومَة هدوم

مشْرورَهْ فى الطين..

والهموم

ما حاتَنْشَف

حتى لو نِشِف البحر

والنساوين

والغيوم

ما حاتَنْشَف ..ما حاتَنْضَف ما..

والعمدَهْ فوق راسك هتف:

(مسئول كبير زاير البلَد

وانتَ يا طه العِماد..

إنتَ الفهَم..

إنتَ السنَد

لِمَّ الصغار

وزِّع عليُهم كلِّ واحد..

فَرْد ..فَرْد

الفرحَهْ

وافرُش سِكّتْهم مرات طراوَهْ و..

مرّهْ وَرْد..

ولمَّا يهتفوا فى الفصول

يحيا ويدوم عاش البطل

!!ما يكون هُتاف

من أىِّ فَم..

يطْلَع زَخم..يطْلَع زبَد

تنْهدَّ حيشان البيوت

والفرحَهْ فى أحسَن مزاج

لا تْخَلِّى دابَهْ..

ولا تُرابَهْ

ولا أحد)

هل انتهى يا ربى زيَّاك العَمَد

يا ود خدوم

وانت سايس للعقول

دَه عليكَ إنت بَراك بعْرِف:

هل تقدّم

أم تزحْزَح
!أم جَمَد

والمديرِس ودْ خدوم

مع إنّو فى حلْقُو مو عَلّق

كُلَّ أجراس المدارِس

كلَّ صوت فى الدنيا عابِس

بِرَجْفَهْ لصَقَت فى سُنونو ،

كلُّ رجفات المساكين ،

والعواجيز ..

والعوانِس ..

صوت بيتْعرَى ويضِيع

ويلمُّو صوت تَرْيان.

ولابِس..

***

وصرخْتَ يا طه وصرَخ

ضُل المشاوير..

فى الأصيل.

فى الساحَهْ رفَعَت مُقْنَعهْا

الذِّلَهْ ... والصبر الطويل

رقَصَت مع الكلمات

شُجون..

وجَرَت ورا الأحرف

خُيول :

"!!يا عُمْدهْ هوي"

حامت على الناس القَماري

وزّعَتْ سَعَف النخيل..

" !! يا عُمدهْ هوي"

مَشَت سحابَهْ

وجات ربابَهْ وزفَّهْ قامت

فى الطبول

"!!يا عمدة هوي"

الغافى فارق غَمْدَتُو

والصاحى تَمْتَم..

فى ذُهول

قام ودْ خدوم

"يا عُمْدهْ هوي"

يا عُمْدهْ بالله إخْتَشِى..

للعوْرَهء ما بِنْفَع هُتاف

للسوسَهْ

ما بْفِيدَك حَشِى

علّمْتَنا الجري فوق جروحنا

وقلتَ:أبداً

!!دَه المَشِي

خَتْيتْنَا فى قلب المشاكل

وصِحنا كُلّنا

" مافى شِي..

كلمَهْ واحدَهْ..

جناب سعادتَك

من ضمير ما مُرتَشِى

الحِلَّهْ يا .."

والعُمدَهْ ..أو سلطانو قام:

"الحِلَّهْ أيه..؟

حتَّه مُعلم مُبتدىء..

الحِلَّهْ أيه

مسئول كبير زاير البلد

لا ودْ خَدوم

ولا ألفِ شُوم

أو ألأف بوم

!!حيَعَلِّم الوِّز كيف يعوم"

والعُمدَهْ جابِر..

دَه الصباح

مدَّ إيدو على الدفاتر

وقبلما ما ينْصَر جبينو

كان شطب كلَّ المساخِر

اللِّى حاضِر

من مساخِر

والمُسافِر

ما عدا السجن العُمومي