]بحب بالجد -- رائعة ( طارق الامين )

بحب بالجد --

رائعة ( طارق الامين )



بحب بالجد

ومن غير حد

أحب بالجملة والتقسيط

أحب بالدور بدون فطفيط

أحب من كسلا لي مليط

أحب من حلفا لي توريت

أحب من دون عذر واسباب

وازيد كل ثانية في الاحباب

أحب الجامعة والطلاب

أحب الثانوي والكُتاب

أحب الوالي والارباب

وأموت في كورة الشراب

أها ما لكم.. شنو ليكم؟

بحب الطالبات من جم

وأشوفن زي بنات العم

وأشوف فيهن ظرافة دم

تخلي هوا الحياة أنعم

تسوي على الجراح بلسم

تزيد فرح الوطن الهم

تخلي الحاقدين أرحم

وتخلي الجيم ثري ابكم

أها ما لكم.. شنو ليكم...؟

بحب أنا مية في المية

كل تنهيدة سودانية

حتى الفول مع الطعمية

هم العملو لي شخصية

أحب ميدان ابو جنزير

وأغاني خضر بشير والصير

بحب عرمان وسلفاكير

ومنكر في القبير.. ونكير

أحب عمر البشير كمشير

وأحب حسن الترابي كغير

ومحمد صالحين وغدير

وعوض الشكسبير كخطير

وطه على البشير ككبير

ام درمان وشارع كرري

وشاطي أبروف.. سرير في سرير

أحب العدل و«الحرية»

والجبهة الديمقراطية

بحب كل حاجة سودانية

حتى لو افترضنا «غبية»

بحب الصادق المهدي

حفيد القبة والمهدي

بريدو وليهو طال سهدي

وضاع صبري وكمل جهدي

أها مالكم.. شنو ليكم ...؟

أحب تاريخنا أب ضجة

وأريد المهدي وأبقرجة

أحب العود والكمنجة

والعسكري أب طبنجة

أحب عون الشريف قاسم

وبدري وبابكر وقاسم

أحب الغنا والمراسم

وبحلم بالخليل باسم

وأحب ضل شجرة واقع في بياض

جنحين حمامة بتنقد الحبة

جمب سحلية مكتأبة

وأتوه في بحر المحبة

وأحب أولاد أبو قفطان وناس قطان وابو جبة

وأحب ناس خوجلي العثمان حبة.. حبة

أحب اولاد القماير واحب اصحاب الضماير

والبنات أم خصلا مساير

أحب كل قادة العشاير

وأموت في البت أم ضفاير

أحب ناس حوا الطقطاقة

وأموت في وزارة الطاقة

والباسبورت والبطاقة

أحب شيخ المرغنية

ومامون العجيمية

أريد كل الافندية

حتى البمشو كداري

والما صرفو ماهية

أها مالكم.. شنو ليكم ...؟

أريد الويكة والدمعة

وصورة النيمة في الترعة

أحب لمة سوق الجمعة

وأموت أنا في ندى القلعة

أريد محجوب كبوشية

وأحب سوق الحرامية

وأحب معمورة منشية

وأحب عاشة الفلاتية

أحب أولاد حاج الماحي

البيشعلو فرح الضواحي

اللي بيهم طابت جراحي

والبواصلو النمة صباحي

وبرضو بعشق معتز صباحي

أحب نادر واحب حوتة

وجمال فرفور

وبرضو عصام محمد نور

وكل مغمور وكل مشهور

وأغاني السيرة والطمبور

بحب أنا كل سوداني

يستريح في جوه وجداني

المحبة الدايمة عنواني

والبريد في العالم التاني

أحب قدال.. احب حميد

وكل الشعراء .. حتى الطيف

ومحجوب الكلامو شريف

ارقى شاعر واجمل ظريف

لو بقرة عترت يوم في الجريف

هو البساهر حد النزيف

أنا بحب ناس بيت الامانة

وناس علي ابو راس الفي السجانة

لو مرة جات عصفورة زهجانة

يعزموها غدا وبرتكانة

وتاني ترجع.. تصدح معانا

أنا بحب اهلي الفي الديوم

البشوفو الدنيا باليوم

هم رجال التقوى والصوم

وهم قيامتنا الـ ح... تقوم

بحب مجان

احب لله .. بدون الكبرياء والجاه

واحب الله..

وأحب كل البحب الله

واحب شكر الله خلف الله..

وخليفة ولد حسن بله

ولحدت حمزة عوض الله

أحب الهيلاهوب .. وتيراب

وكل الشعراء والكتاب

دكتور مرتضى الغالي

الاديب الشاب

وعثمان ميرغني الكتاب

البوني وزهير وحسين

وحاج وراق

وحتى البدعو للارهاب

وأحب فى الكورة جندي نميري

وهيثم مصطفى اللعاب

أحب نقد.. وعلي عثمان

والمسجون والسجان

واحب محمود محمد طه ـ

والحرية واللا خوف من الاحزان

واحب الحاج عطا المنان

والشيوعية والكيزان

مادام كلو في السودان

اها مالكم.. شنو ليكم؟

أحب الطرق الصوفية

واحب ناس شيخ الهدية

واحزابنا اليسارية واحزابنا اليمينية

وسجادة المكاشفية

اها مالكم.. شنو ليكم؟

بحب ديلا وبحب ديلاك

منو البقدر يمنع قلبي بي قانون

من حب مافي منو فكاك

وشنو ليكم؟

بحب متمردي دارفور وحكاياتم

واحب الجنجويد ذاتم

اها مالكم؟ شنو ليكم ...؟

أحب باقان وادوارد لينو

والشهداء من الطرفين

احب الماتو دبابين

علي الفتاح وطه الماحي والباقين

اها مالكم.. شنو ليكم ...؟

أحب عبد العزيز خالد

والدكتور منصور خالد

والدكتور عمر خالد

احب فاطمة وربيكا كمان

كحب الوالدة والوالد

اها مالكم ...؟ شنو ليكم ...؟

احب الشوش

وفيليب غبوش

وعبد الناصر الطائف

كمان بالذات

محمد ود نعيم سعد الحلو البسمات

وفايزة اختنا بت عمسيب

في عيني لسه شباب ولسه بنات

وأحب شمبات

ومبارك حسن بركات

احب الاب فيلو ثاوس

وكل جنودنا الاشاوس

والجامع والكنيسة..

واحب علوية وخميسة

احب دكتور مهندس بروفسير

عبد المنعم عطية

صحي ما شفتو قبال دا

ولا لاقتني كورساتو المكثفة بالالمانية

بس عاجبني اسمو شديد

وبكون زول عندو شخصية

بهذا اعلن الحب الكبير

بدون فترة انتقالية

محبة اكيدة دايمة كمان

محبة وطاقة ازلية

وادعوكم جميعاً للمحبة بصورة رسمية

بدون قانون.. وأي ظنون

وافكار فارغة زي ديّ

متين يكبر معانا الحب ...؟

ويصبح حاجة عادية ...؟

متين نعرف نحب الناس

ونمسح ماضي الازية ...؟

متين نعرف نعيش الحب

بدون ادنى انتهازية ...؟

متين ح تشيلني في عيونك

واشيلك جوة عيني ...؟


طارق الأمين